"သူငယ်ချင်းရောက်လာခြင်း"

အဖြူရောင်၊ အပြာရောင်၊ ငွေရောင်နှင့် မီးခိုးရောင်တို့ကို အဆင်ပြေချောမွေ့စေရန် မည်သို့မည်ပုံ ဆက်စပ်ချယ်မှုန်းရမည်ကို နားလည်တတ်ကျွမ်းသူ ပန်းချီဆရာတစ်ဦးမှ ရေးချယ်လိုက်သည့် အနုစိပ်လက်ရာ ပန်းချီကားတစ်ချပ်ကဲ့သို့ မိုးကောင်းကင်ကြီးတစ်ခုလုံးသည် မှုန်ရီပြာခိုး ဖြူဖွေးမိုးလျက် လှပတင့်ဆန်းနေ၏။

အထက်ကောင်းကင်မိုးအမြင့်ထက်ဆီမှ အဖြူရောင်နှင်းပွင့်များက မြေပြင်အောက်ခြေဖက်ရှိ အဖြူရောင်နှင်းသားများ ဖုံးအုပ်လွှမ်းခြုံထားသည့် မြေသားများ၊ အရိုးပြိုင်းပြုင်းသစ်ပင်ချုံပုတ်များနှင့် အရောင်ဖျော့တော့နေသော အစိမ်းရောင်မြက်ခင်းများ၏ အပေါ်သို့ တဖြုတ်ဖြုတ်နှင့် စဉ်ဆက်မပြတ် ဆက်တိုက်ပြုတ်၍ ကျနေ၏။

နှင်းများပြုတ်ကျနေပုံမှာ မြန်မာနိုင်ငံရှိ မိုးကောင်းသော အရပ်ဒေသများ၌ မိုးဦးကျချိန်၊ မိုးပြေးမိုးစက်များမလာမီ ဦးစွာ ရောက်၍ လာတတ်သော မုတ်သုန်လေမြူး၏ တဗျောင်းဗျောင်းတဗျင်းဗျင်း တိုက်ခတ်မှု့ကြောင့် သရက်ပင်များ၏ ပင်ယံထက်မှ ဝေဝေဆာဆာဖြင့် တွဲရွဲပြွတ်သိပ်နေသော သရက်ကင်းများနှင့် သရက်သီးစိမ်းအသီးများသည် အပင်ထက်ပေါ်တွင် ဆက်လက်ရပ်တည်နေထိုင်နိုင်ခြင်းငှာ မစွမ်းနိုင်တော့ရှာဘဲ မြေပေါ်သို့ တဖုတ်ဖုတ်ပြုတ်၍ ကျနေဘိသကဲ့သို့ ဖြစ်၏။

ကြည့်လေရာ မြင်လေရာ ပါတ်ဝန်းကျင်ထက်အောက်အရပ်ရပ်၌ အဖြူရောင်နှင်းများက နေရာအားလုံးကို သိမ်းပိုက်ရယူထားကြပါပေသည်ဟု ဆိုရလောက်အောင် တနေ့လုံး တညလုံးကျထားသောနှင်းများက လွန်စွာ ထူထပ်နေကြ၏။

ထိုကဲ့သို့ ပြင်ပရှိ ရေကန်ရေအိုင်များသာမက ပြင်ပ "မိုးစက်တင်လေ" (အဲလေ) "နှင်းပွင့်တင်လေ" တွေပါ ရေခဲဖြစ်မတတ် လွန်စွာ ချမ်းအေး၍ နေပြီဖြစ်သော ဆောင်းတွင်းအစ ဒီဇင်ဘာလ နှစ်ဆန်းတစ်ရက်၊ စနေနေ့တွင် အမေရိကန်နိုင်ငံ၊ တောင်ပိုင်း"ကယ်လဖိုးနီးယား" ပြည်နယ်၌ နေထိုင်သူ 'ကိုဖိုးသိ'သည် ၎င်း၏အလုပ်ကိစ္စတစ်ခုဖြင့် အနောက်"မီချီဂန်" ပြည်နယ်သို့ ရောက်ရှိလာ၏။

ငယ်စဉ်ကတည်းက သိကျွမ်းရင်းနှီးခဲ့ခြင်းမဟုတ်သော်လည်း ငယ်သူငယ်ချင်းတမျှ ရှင်းနှီးသိကျွမ်းခင်မင်ရသည့် 'ကိုဖိုးသိ'သည်  "ဂရဲန်းရက်ပစ်" မြို့အပြည်ပြည်ဆိုင်ရာလေဆိပ်မှ သူငှားရမ်းမောင်းနှင်လာခဲ့သည့် အငှားကားတစ်စီးဖြင့် အနောက်"မီချီဂန်" ပြည်နယ် "ဘိုင်ရွန်စဲန်တာ" တောမြို့လေးရှိ ကျွန်ုပ်၏နေအိမ်သို့ မပြောမဆို ရောက်ချ၍ လာခြင်းဖြစ်၏။

နုပ်  ။"မောင်ရင်ကလည်း မပြောမဆို လာရသလား၊ အမေရိကန်တွေလိုမျိုး လူကိုယ်တိုင်မလာခင် ကြိုပြီး ဆက်သွယ်အသိပေးသင့်တာပေါ့ အိမ်မှာ ဘယ်သူမှ မရှိနေရင် မခက်ပါလား"(အပြစ်တင်လိုက်သည့် အလိုမကျသည့်မျက်နှာပေးဖြင့်)

သိ။  ။"ပို့ပါသောကောကွယ်၊ ကိုယ့်လူရဲ့"ဖေ့စ်ဘွတ်"က ပေါ်လိုက်ပျောက်လိုက်နဲ့ဆိုတော့ခါ ကိုယ်ပို့ထားတဲ့ မက်ဆေ့ချ်တွေကို ကိုယ့်လူ မမြင်မဖတ်မိလို့ ထင်ပါရဲ့ ကိုယ့်လူက ကိုယ်ရေးချင်ရာတွေရေးပြီး သူများဟာတွေကိုကျတော့ မဖတ်ဘဲ ပျောက်ပျောက်သွားတာကိုး" (ခေါင်းခါလျက်)

နုပ်။  ။"ဒါက ဒီလိုရှိပါတယ် ကျွန်တော်က မအားတာကလည်း တစ်ကြောင်း၊ နောက် ဒီဖေ့စ်ဘွတ်ဆိုတာကြီးက သုံးမိရင် အချိန်တွေ ကုန်လွန်းလို့ အကျင့်မပါအောင် ခဏခဏ မကြည့်မိအောင် ကြိုးစားတဲ့အနေနဲ့ ဖုံးထဲက "အက်ပ်" တွေပါ ဖျက်ထားလိုက်လို့ပါ"(ပါးစပ်ကို ဖြဲလျက်)

သိ။  ။"ရှိပါစေတော့ကွယ် ကဲကဲ အေးလွန်းလို့ သေတော့မယ် အိမ်ထဲဝင်ပြီးမှ ဆက်ပြောကြတာပေါ့"(ကျောပိုးအိပ်နှင့် လက်ဆွဲအိတ်ကို ဆွဲလျက်)

နှစ်ဦးစလုံး အိမ်ထဲသို့ရောက်၍ ပစ္စည်းများ ချထားခြင်း၊ လက်ဆွဲဖက်ရမ်းနှုတ်ဆက်ကြခြင်းများကို အစဉ်အတိုင်း လုပ်ဆောင်ကြပြီးလျှင် ဧည့်ခမ်းဆိုဖာများပေါ်၌ နှစ်ဦးသား ထိုင်ကြပြီးသည့် ခဏတွင် ကိုဖိုးသိ၏ ချမ်းအေးနေသည့်အဖြစ်ကို သတိပြုမိသော ကျွန်ုပ်က အနီးအနားရှိ မှန်ကာထားသော ဓာတ်ငွေ့သုံးမီးဖိုကြီး၏ ပန်ကာခလုတ်နှင့် မီးညှိသည့် ခလုတ်များကို "ဒေါက်ခနဲ" လှမ်းဖွင့်လိုက်ရာ မီးဖိုကြီးဆီမှ "ဝုတ်ကနဲ" မီးများတောက်လောင်လာလေ၏။

ထိုစဉ်ခဏ၌ အိမ်ရှင်မ နှင့် သားသမီးများက ကားတစ်စီးဖြင့်  အပြင်မှဆိုက်ရောက်၍ ပြန်ရောက်လာကြသည်ဖြစ်ရာ ကလေးများနှင့် အိမ်ရှင်မက ကိုဖိုးသိကို နှုတ်ဆက်စကားဆိုကြခြင်း၊ ကိုဖိုးသိ၏ ပြန်လှန်နှုတ်ဆက်စကားဆိုခြင်း၊ ကျွန်ုပ်၏ စကားဆိုခြင်းနှင့် အားလုံး၏ ရီမောခြင်းတို့၏ အသံများအပြင် ကိုဖိုးသိက ကယ်လဖိုးနီယားမှ ၎င်းဝယ်ယူသယ်ဆောင်လာသည့် တရုတ်မုံ့များ ဖီလစ်ပိုင်မုံ့များကို သူ၏ လက်ဆွဲအိတ်မှ ဆွဲထုတ်ဝေငှလိုက်ရာ မုုံ့များကို ဝိုင်ဝန်းလုယက်နေသည့် ကလေးများ၏ အသံများဖြင့် ဆူညံသွားလေ၏။

သူရောက်လာသည့်အချိန်မှာ နေ့လည်စာမစားရသေးသောအချိန်ဖြစ်၍ များမကြာမီအချိန်အတွင်း၌ အိမ်ရှင်မ၏မီးဖိုချောင်အခန်းမှ လှီးချွတ်ကြော်လှော်သံများက မတွေ့တာ အတော်ကြာနေပြီဖြစ်သော သူငယ်ချင်းနှစ်ဦး၏ ဟိုရောက်ဒီရောက်စကားသံရီမောသံများ၏အကြားတွင် ထပ်မံဆူညံသွားလေတော့၏။

ကျွန်ုပ်မှာ ကိုယ်တိုင်က သောက်စားတတ်သူမဟုတ်လင့်ကစား သောက်စားတတ်သူမိတ်ဆွေများ၏ အစာမစားမီ အနည်းငယ်မှီဝဲတတ်သည့်အလေ့အကျင့်ကို သဘောပေါက်နားလည်သူဖြစ်ခြင်း၊ သောက်စားတတ်သူ မိတ်ဆွေများပေါများခြင်း၊ ထိုသူတို့ မကြာခဏ အလည်လာလေ့ရှိသဖြင့် တင်ကြိုဝယ်ယူထားလေ့သည့် မီချီဂန်ဝိုင်၊ မီချီဂန်ဘီယာနှင့် မီချီဂန်ဝီစကီ အနည်းငယ် လက်ကျန်ရှိနေခြင်းတို့ကြောင့် အိမ်ရှင်မ၏ လက်စွမ်းပြ ဗမာထမင်းဟင်းများ အသင့်မဖြစ်သေးခင်စပ်ကြား၌ အဆိုပါ ဝိုင်၊ ဘီယာနှင့် ဝီစကီတို့အပြင် အရှေ့အလယ်ပိုင်း ကုန်စုံဆိုင်ကြီးမှ ဝယ်ယူ၍ အိမ်ရှင်မကိုယ်တိုင် ကြွတ်ရွမွှေးပျံ ့နေအောင်ဖုတ်လှော်စီမံထားသည့် မြေပဲလှော်တစ်ပန်းကန်နှင့်  "ကော်စကို" ကုန်စုံဆိုင်ကြီးမှ မနေ့ကမှ ဝယ်ယူခဲ့သော "ကော်ဘီ ဒိန်ခဲ" (Colby Chese) အပြားများကိုပါ တွဲဖက်၍ သိုက်မြိုက်စွာ ဧည့်ခံလိုက်ရာတွင် ကွမ်းယာ၊ ဆေးလိပ်၊ စီးကရက်နှင့် ဆေးတံတို့ကို သုံးစွဲခြင်း မရှိသော်လည်း အစာမစားမီ "တစ်ငုံနှစ်ငုံ" အစာစားကောင်းအောင် "အာသွက်လျှာသွက်"အနည်းငယ်သောက်လေ့ရှိသူ ကိုဖိုးသိအတွက် များစွာအဆင်ပြေသည်ကို မြင်တွေ့လိုက်ရသော ကျွန်ုပ်မှာ သူငယ်ချင်း အတွက် လွန်စွာဝမ်းသာကြည်နူးမိပါသည်။

ကိုဖိုးသိမှာ ကျွန်ုပ်၏ အတော်ကြီးရင်းနှီးခင်မင်ရသူဖြစ်ပြီး ထိုသူနှင့် မတွေ့ဆုံရသည်မှာနှစ်အတော်ကြာခဲ့ပြီဖြစ်၍ မြန်မာ၊ အမေရိကန်နှင့် ကမာ့ နိုင်ငံရေး၊ လူမျိုးရေး၊ ဘာသာရေး၊ ကျန်းမာရေး၊ စီးပွားရေးများအပြင် ငယ်စဉ်က အကြောင်းများကိုပါ ဟိုရောက်ဒီရောက်အပြန်အလှန်ပြောဆိုရယ်မောကြရင်းဖြင့် အချိန်ကုန်မှန်းမသိကုန်လာခဲ့ရာတွင် အိမ်ရှင်မ၏ နေ့လည်စာအသင့်ဖြစ်ကြောင်း အသိပေးသံကြားမှ နှစ်ယောက်သား ဧည့်ခမ်းတွင်း၌ စကားပြောဆိုခြင်းကို ရပ်လိုက်ကြပြီး အိမ်ရှင်မပြင်ဆင်ထားသောထမင်းစားပွဲသို့ပြောင်းရွှေ့ထိုင်ကြလေတော့၏။

များမကြာမီအချိန်အတွင်း၌ ထမင်းစားသောက်ခြင်းပြီီးဆုံးသွားပြီးသည်ဖြစ်ရာ သူငယ်ချင်းနှစ်ဦးမှာ ဧည့်ခမ်းသို့ပြန်လည်ပြောင်းထိုင်ကြရင်း ကုလားအချိုမုံ့များ၊ ငှက်ပျောသီးများ၊ နာနတ်သီးခြမ်းများနှင့် လက်ဘက်ရည်အကြမ်း ပန်းကန်ခွက်တစ်လုံးစီကို ရှေ့တွင်ချလျက် မပြီးဆုံးသေးသော လက်ကျန်စကားဝိုင်းကို ဆက်လက်ပြောဆိုလေတော့၏။

သိ။  ။"ကိုယ့်လူမို့လို့ ဒီလောက်အေးတဲ့နေရာကို ပြောင်းလာရတယ်လို့ တကထဲကွယ် လူနေတဲ့နေရာမှမဟုတ်တာ ကိုယ့်လူ ပြောတဲ့ 'တီတီတာတာ နဲ့ ငှက်တွေ' ကိုလည်းမမြင်ရပါလား 'ကဗျာဆန်ဆန်ပိုးစုန်းကြူးတွေရှိတာပေါ့' လို့ ဆိုပြီး ကိုယ့်လူ ရေးထားတဲ့စာကို ကျုပ်ဖြင့် မယုံနိုင်ဘူး အံ့ပါရဲ့"(ပြုတင်းအပြင်ရှိအဖြူရောင်နှင်းများကိုကြည့်လျက်)

နုပ်။  ။"ဪသူငယ်ချင်းရယ် တစ်နှစ်ပါတ်လုံးနှင်းကျအေးခဲနေတာမှမဟုတ်တာပဲ ကျွန်တော်တို့ ကယ်လဖိုးနှီးယားမှာနေခဲ့တုန်းက ဆောင်းတွင်းဆိုရင်နှင်းကျနေတဲ့ "ရီးနို" (Reno) "တာဟိုး" (Tahoe) နဲ့ "ဘစ်ဘဲ" (Big Bear)နေရာတွေကို တကူးတက သုံးနာရီလေးနာရီ ကားမောင်းသွား ညအိပ်ညနေ သွားခဲ့သေးတာပဲဥစ္စာ အခုက ဘာမှ သွားစရာမလိုပဲ နှင်းက ကိုယ့်အိမ်အရှေ့သူ့ဖာသာရောက်လာတာပါ မောင်ရင်ကရော နှင်းရှိတဲ့နေရာတွေကိုသွားလည်လေ့မရှိဘူးပေါ့ဟုတ်လား"(နာနတ်သီးတစ်ဖတ်ကို ခက်ရင်းဖြင့်ထောက်လျက်)

သိ။  ။"ဒါတော့ ဒါပေါ့ ကျုပ်နေတဲ့ ကယ်လဖိုးနီးယားကို မိတ်ဆွေတွေဆွေမျိုးတွေ ဆောင်းတွင်းလာလည်ရင်တော့ လိုက်ပို့ပေးဖူးပါရဲ့ ကျုပ်ဖြင့် ဒီနှင်းတွေနဲ့ အေးတာကြီးကို မကြိုက်ပေါင်ဗျာ၊ ကားမောင်းရတာလည်းမကောင်း အပြင်ထွက်လမ်းလျှောက်လို့လည်းမရနဲ့ မလွတ်မလပ်ကြီး"(ရေနွေးကြမ်းကို မှုတ်လျက်)

သိ။  ။"ဒါနဲ့ကိုယ့်လူကိုပြောရအုန်းမယ် ကိုယ့်လူရေးထားတဲ့ မီချီဂန်ရေကန်အကြောင်း ဖတ်ရတယ်၊ မီချီဂန်ရေကန်အကြောင်းကတော့ ထားပါတော့ တကထဲဗျာ ကိုယ့်လူက တဖက်စောင်းနင်းလျှောက်ရေးထားတာပဲ ဘာတဲ့ 'တောမီးမလောင် ရေမရှား မိုးမရှား ငလျင်မရှိ ပင်လယ်မုန်တိုင်းမရှိ' ဟုတ်လား ဘာလဲ ကိုယ့်လူက ကျုပ်တို့နေတဲ့ ကယ်လဖိုးနီးယားကို စောင်းရေးတာလား ကိုယ့်လူနေခဲ့တဲ့ အိမ်အဟောင်းနေရာကို ကိုယ့်လူက ရှုံ ့ချတာလား ကိုယ့်နေရာအဟောင်းကို နည်းနည်းလေးတော့ ညှာတာသင့်ပါတယ် ကိုယ့်လူက မရှက်ပေမဲ့ ကျုပ်တော့ ရှက်မိတယ် ကိုယ့်လူတော့ မပြောတတ်ဘူး"(ခေါင်းခါလျှက်)

နုပ်။  ။"ပြောတော့မောင်ရေ ငါတော့ဖြင့် ရေးမိပြီကွယ် မောင်ရင်ပြောသလို စောင်းရေးသလိုဖြစ်သွားတာကို ဝန်ခံပါတယ် သို့သော် ကယ်လဖိုးနီးယားကို မုန်းလို့ ရှုတ်ချတဲ့သဘောတော့မဟုတ်ရပါဘူး ငါ အရမ်းချစ်ပါတယ် ခုဟာက လွမ်းလည်းလွမ်း၊ ကြားရတဲ့တောမီးလောင်တဲ့သတင်းတွေကြောင့်မို့ မချိတင်ကဲ ဝမ်းနည်းမိရာကနေ  မစဉ်းစားပဲ နှိုင်းယှဉ်ရေးမိသလိုဖြစ်သွားတာပါပဲ"(ခေါင်းငုံ့လျှက်)

သိ။  ။"ထပ်ပြောရအုန်းမယ် ကိုယ့်လူရဲ့ မီချီဂန်က ဘာကောင်းသလဲ နှင်းကျတော့ လမ်းတွေချော်တာထားအုန်း ကျုပ်လမ်းပေါ်မယ် မြင်လာခဲ့တာတွေကို ပြောပြရအုန်းမယ် လမ်းပေါ်မှာ ရေခဲတွေ ပျော်အောင်လို့ ဖြူးထားတဲ့ ဆားကြမ်းတွေကြောင့် ဒီမှာ မောင်းနေတဲ့ ကားတွေရဲ့ ဘော်ဒီတွေ အောက်ပိုင်းတွေ အကုန်သံချေးကိုက်ကုန်တယ် သံချေးစားထားတဲ့ကားတွေကို အများကြီးတွေ့တယ် ကျုပ်တို့ ကယ်လဖိုးနီးယားမှာ သုံးနေတဲ့ ကားတွေက အင်မတန်မှ သန့်တယ် "စမုတ်ချက်" (Smoke Check) နှစ်နှစ်တစ်ခါလုပ်ရလို့ ကားဟောင်းတွေကို မမြင်ရဘူး ဒီမှာက စမုတ်ချက်စရာမလိုတော့ ကားစုတ်တွေက မီးခိုးတွေနဲ့ တဖုတ်ဖုတ်သွားနေတယ် ဘာကောင်းသလဲ စိတ်ပျက်ဖို့ပဲ ကောင်းတယ် မဟုတ်လား"(ကုလားအချိုမုန့်ကို ဝါးလျှက်)

နုပ်။  ။"ဪ မင်းက စ, တွယ်ပြီ မှတ်တယ် သို့သော် ကားတွေသံချေးတက်တာက ကားကို မှန်မှန်ရေမဆေးတဲ့သူတွေပါ ဒီမှာက နှစ်စဉ်ကြေးပေးပြီးရင် အကြိမ်အကန့်အသန့်မရှိ ကားရေဆေးလို့ရပါတယ် ငါတို့တော့ နှင်းကျတိုင်း အပြင်ကပြန်လာပြီးရင် အနားမှာရှိတဲ့ ကားရေဆေးတဲ့ဆိုင်ကို မှန်မှန်ဝင်ထိုးတာပဲ မောင်ရေ"(ရေနွေးငှဲ့ပေးလျှက်)

နုပ်။  ။"အိုင်ဆေး မီချီဂန်က ကယ်လဖိုးနီးယားထက် တိုးတက်တယ် သာတယ် ချမ်းသာတယ် လို့ ရေးခြင်း မဟုတ်ရပါဘူး မီချီဂန်ရဲ့ သဘာဝအရ ကန်ကြီးတွေဝိုင်းနေတာတို့ ကုန်းပေါ်မှာလည်း ရေကန်တွေ မြစ်တွေ သဘာဝအရ ဖြစ်နေပေါနေတာကို သူငယ်ချင်းတွေ သိရအောင်ရေးတာပါ ကယ်လဖိုးနီးယားက သူဋ္ဌေးပြည်နယ်ပါ ရေရှား မိုးနည်းလည်း စီးပွားရေးက ခိုင်တော့ ဗဟိုအစိုးရကြီးရဲ့ တချို့အထောက်အပံ့ကို မရရင်တောင် အေးအေးဆေးဆေးရပ်တည်နိုင်တဲ့ပြည်နယ်ပါ ငါကတော့ နေချင်ပေမဲ့ ဈေးကြီးလို့ မနေနိုင်လို့ ထွက်လာရတာပါမောင်ရယ် မီချီဂန်က အကုန်သာတယ်လို့ ငါရေးတယ် တွေးတယ်လို့ မင်းက ထင်လိုက်ရင် မင်းမှားတော့မပေါ့"(မျက်နှာကိုကြည့်လျှက်)

သိ။  ။"ကိုယ့်လူက ရေးချင်တာသာသိတာကိုး မီချီဂန်မှာ မုန်တိုင်းမရှိဘူးတို့ ငလျင်မရှိဘူး ဆိုပြီးမင်းရေးထားတာတွေဟာ မမှန်ဘူးဆိုတာကို ကျုပ်သိပါတယ်ကွယ် ကနေဒါနဲ့ဆက်နေတဲ့ ငလျင်တွေ တစ်ခါတစ်လေလှုပ်တတ်တာကို ကိုယ့်လူမသိလေရော့သလား ဟိုနေ့ကပဲ "ဒီထရိုက်" မြို့က သတင်းစာတစ်ခုအထဲမယ် ကိုယ့်လူတို့ရဲ့ မီချီဂန်မှာ "ဘလစ်ဇတ် စတောဲန်" (Blizzard Storm) လိုနှင်းမုန်တိုင်းတိုက်ခတ်နိုင်လို့ ငါးလက်မကနေ ရှစ်လက်မအထိနှင်းတွေထူထပ်နိုင်တဲ့အတွက် လေယာဉ်ပျံအတက်အဆင်းအချိန်ဇယားတွေပါ အကုန်ထိခိုက်နိုင်မယ်လို့ ရေးထားတာကို ကျုပ်ဖတ်ရပါတယ် ဒီနှစ်အထဲမှာပဲ သြဂက်စ်လတုန်းကလည်း ကိုယ့်လူပြောတဲ့ "အထက်ပဲန်နဆူးလား" နဲ့ မြောက်ပိုင်းမီချီဂန်မှာ လေပြင်းမုန်တိုင်းတွေ၊ လေပြင်းတွေတိုက်ခဲ့လို့ ပါဝါလိုင်းလျှပ်စစ်မီးတွေ ပြတ်တောက်ခဲ့တာတွေ အိမ်တွေပျက်စီးခဲ့တာတွေကို ကျုပ်ဖတ်ဖူးပါတယ်ကွယ် မီချီဂန်မှာ "တိုနာဒိုး" (Tornado) မုန်တိုင်း တိုက်လေ့ရှိတာကို ကိုယ့်လူမသိတာကိုတော့အံ့သြမိပါရဲ့ စာရေးတဲ့နေရာမှာ စာဖတ်သူကို စော်ကားတဲ့သဘောမျိုး ဖြစ်စေတတ်တဲ့ သေသေချာချာမသိဘဲ အမှားတွေပါ ပါနေအောင် ဟိုရောက်ဒီရောက် လျှောက်ရေးတဲ့စာမျိုးကို ကိုယ့်လူရေးနေတယ်ဆိုတာကို ကိုယ့်လူသိအောင် ကျုပ်ပြောတာပါ အလို(ကိုဖိုးသိက အံသြဟန်ဖြင့် ဧည့်ခမ်းနှင့်ကပ်ရက် စာဖတ်ခန်းမှ စာအုပ်စင်များကို လှမ်းကြည့်ရင်း ရုတ်တရက် ထ၍ ထွက်သွားသဖြင့် ကျွန်ုပ်လည်း သူနှင့်အတူ စာဖတ်ခန်းသို့ ထပ်ကြပ်မကွာ လိုက်ပါသွားရ၏)

ဤနေရာတွင် ကျွန်ုပ်၏အကြောင်းကို ဝါကြွားခြင်းမပါ၊ အဆိုးအကောင်းမှန်ရာကိုရေးသားရမည်ဆိုသော် ကျွန်ုပ်သည် ငယ်စဉ်ကျောင်းနေစဉ်ကာလများ၌ သူငယ်တန်းမှဆဋ္ဌမတန်းအထိ ပညာရည်ချွန်ဆု ဒုတိယဆင့် နှင့် တတိယဆင့်ဆုများကို ရရှိခဲ့ဖူးသည်မှာ ဘဝရည်မှန်းချက်ကြီးကြီးမားမားရှိသော လူချွန်လူတော်တစ်ယောက်အဖြစ်ရခဲ့ဖူးခြင်း မဟုတ်ခဲ့ဘဲ ထိုသို့ ဆုများရရှိခဲ့ခြင်းသည် ကျွန်ုပ်ငယ်စဉ်ကတည်းက ချစ်ခင်စွဲလမ်းခဲ့ရသူအတန်းတူကျောင်းသူကလေးတစ်ဦးကြောင့် စာကြိုးစားခဲ့၍ ရခဲ့ခြင်းဖြစ်ကြောင်းကို ဝန်ခံပါသည်။

"သူကလေး"မှာ အတန်းထဲ၌ အမြဲတမ်းအဆင့်တစ်ပထမနေရာကို ကိုင်ဆွဲထားနိုင်အောင် စာတော်သူလေးဖြစ်၍ ကျွန်ုပ်မှာ "သူကလေး" နှင့် ဆုပေးပွဲများ၌ အမြဲတမ်းတူတူကပ်၍ ထိုင်ရခြင်းကို နှစ်သက်ပျော်ရွှင်မိသည့်အားလျှော်စွာ အဆင့်"နှစ်" နေရာကို အမြဲတမ်းရယူနိုင်ရန်ကြိုးစားခဲ့ခြင်းဖြစ်ပြီးလျှင် ဆဋ္ဌမတန်းနှစ်အပြီး၌ "သူကလေး"မှာသူ့မိဘများ၏အလုပ်တာဝန်အရ နယ်မြို့ကျောင်းသို့ ပြောင်းရွှေ့သွားခဲ့ချိန်မှစ၍ ကျန်နေရစ်ခဲ့သူ အဆွေးသမားတစ်ဦးအဖြစ် စာမကြိုးစားနိုင်တော့ဘဲ "လေ"၍ အတန်းစာမေးပွဲများကိုအောင်မြင်သည်ဆိုရုံမျှကျက်ဖတ်ခဲ့သောကျွန်ုပ်မှာ ပြင်ပစာအုပ်များကိုမူ အရူးအမူးစွဲလမ်းစွာဖတ်ရှု့ခဲ့သူတစ်ဦးဖြစ်ခဲ့ပါသည်။

ကွန်ပျူတာဖြင့်ဖတ်ရှု့နိုင်သော အီလက်ထရောနစ်စာအုပ်များထက် လက်နှင့်ထိကိုင်၍လှန်၍မျဉ်းသား၍ရသောပကတိစာအုပ်များကိုပိုမိုနှစ်သက်သူဖြစ်သဖြင့်ဖတ်လိုသောကြိုက်နှစ်သက်သည့်စာအုပ်များကိုဝယ်ယူစုဆောင်းခဲဲ့ပါသည်။

ငါးမြှားချိတ်မှ ငါးစာကိုမြင်တွေ့လိုက်ရသောငါးသည် ငါးအစာနှင့် ဝေးရာသို့ ရှောင်ထွက်သွားခြင်းငှာ မစွမ်းနိုင်သကဲ့သို့ ကျွန်ုပ်စုဆောင်းထားသောစာအုပ်စင်သည် "စာဂျပိုး" တစ်ဦးဖြစ်သူ ကိုဖိုးသိကို ကောင်းစွာ"ဖမ်းစား"လိုက်ခြင်းဖြစ်ပါသည်။

ကိုဖိုးသိသည် စာဖတ်ခန်းထဲရှိ ကျွန်ုပ်၏စာရေးပွဲပေါ်၌ ရှိနေသော စာအုပ်သုံးလေးအုပ်ကို ခေတ္တမျှ လှန်လှောဖတ်ရှု့ပြီးသည့်နောက် စာအုပ်စင်ပေါ်ရှိ စာအုပ်များကိုလည်း စာကြည့်တိုက်တစ်ခုတွင် စာအုပ်စာရင်းပြုစုနေသော တာဝန်ကျသူတစ်ဦးက ထားရှိသော စာအုပ်စင်များပေါ်မှ စာအုပ်များ၏ အထားအသိုကို မှန်မမှန်စီစစ်၊ စစ်ဆေးနေသကဲ့သို့ စိတ်ဝင်စားစွာ လေ့လာကြည့်ရှု့နေလေ၏။ တဖန် စာရေးစားပွဲဖက်သို့ပြန်လာ၍ ထိုင်ခုံတွင်ကျကျနနထိုင်ခါ စားပေါ်တွင်တင်ထားသောစာအုပ်များကို ထပ်မံ၍လှန်လှောဖတ်ရှု့နေပြန်၏။

သိ။  ။"လက်စသတ်တော့ကိုယ့်လူရဲ့မီချီဂန်နဲ့မဟာရေကန်ကြီးတွေက ဒီစာအုပ်ကြီးတွေကနေဘာသာပြန်ကူးချထားတာပဲလို့ဆိုရမှာပါလား နေအုန်းဗျ စသည်အဆုံးတစ်လုံးမကျန်ဘာသာပြန်ထားတာတော့မဟုတ်ပေဘူး ကျန်တာတွေကမဟုတ်မှလွဲရောအင်တာနက်ကနေကိုယ့်လူထပ်မွှေထားတာတွေနဲ့ရောပြီးရေးတာဖြစ်မယ်လို့ကျုပ်ဆိုတယ်မှန်ရဲ့လား(စာအုပ်ကြီးများကိုညာဖက်လက်ဝါးဖြင့်ပုတ်လျက်)

သိ။  ။မီချီဂန်နဲ့ မဟာရေကန်အကြောင်းနဲ့ ပါတ်သက်လို့ အင်တာနက်ကနေ ကိုယ့်လူ ယူရေးတဲ့အထဲမှာ ယူတု့ (youtube) ဗီဒီယိုတွေကိုပါကြည့်ပြီးရေးထားတယ်လို့ကျုပ်အတတ်ပြောနိုင်တယ် ကိုယ့်လူရေးထားတဲ့အထဲက ဗီဒီယိုတွေအထဲမှာ ကနေဒါဖက်က 'လော့ဂ်'တွေကို ဖြတ်ပြီးသွားနေတဲ့ ကာဂိုသင်္ဘောဗီဒီယိုကို ယူတု့ကနေ ဒေါင်းပြီးပြန်တင်ပေးထားပါတယ်လို့ရေးထားတယ်မဟုတ်လား

အဲဒီမှာ ကျုပ်ပြောချင်တာက ကိုယ့်လူရေးတာတွေရဲ့နိဂုံးမှာ ဘယ်က ဘာစာအုပ်တွေကနေ ရပါတယ် မှီငြမ်းပါတယ်ဆိုပြီး စာညွှန်းနဲ့ တိတိကျကျဖော်ပြသင့်တာကိုပဲ နောက်တစ်ခါ ကိုယ့်လူ ဘာရေးရေး ဘယ်စာအုပ်ဘယ်အင်တာနက်ကနေရပါတယ်ဆိုတာကို အညွှန်းဖော်ပြပေးပါ 'လော့ဂ်' ဆိုလို့ (၁၈၂၄) မှာစဆောက်ခဲ့ပြီး (၁၉၃၄) မှာ 'အွန်ထဲရီးယို' ရေကန်ကြီး (Lake Ontario) နဲ့ 'အဲရီ' ရေကန်ကြီး (Lake Erie) ကို ဆက်ပြီး သင်္ဘောတွေ သွားလို့ ရအောင် အပြီးသပ်ပြီးစီးတည်ဆောက်ခဲ့တဲ့ 'ဝဲလဲန်း'တူးမြောင်း (welland canal) အကြောင်းကိုလည်း သေသေချာချာရေးပြပေးသင့်တယ် ကိုယ့်လူရေးထားသလို 'နိုက်ဂရာ'ရေတံခွန်အမြင့်ကြီးကို သင်္ဘောတွေဖြတ်သွားဖို့မဖြစ်နိုင်တဲ့အတွက် ကနေဒါအစိုးရက 'လော့ဂ်' ရေတံခါးပေါင်းရှစ်ခု ဆောက်ခဲ့တာကို ချန်မထားသင့်ဘူး ကိုယ့်လူက အမေရိကန်ဆောက်တာကိုပဲရေးချင်တဲ့သဘောလား စာရေးမယ်ဆိုရင် ပုဂ္ဂိုလ်စွဲတွေ လွတ်အောင်သတိထားပါ(စာပွဲပေါ်ရှိ စာအုပ်ကြီးများကို ညီအောင် စီလျက်)

နုပ်။  ။မှန်ပါတယ်မောင်ရယ် အနောက်ကနေလိုက်ကြည့်နေသလို အကုန်မှန်ပါတယ် နောက်တစ်ခါရေးတဲ့အခါ ထည့်ရေးပေးဖို့ ကြိုးစားပါ့မယ်(ဝန်ခံသည့်မျက်နှာပေးဖြင့်)

ထိုအချိန်တွင် ခရမ်းချဉ်သီး၊ ဂေါ်ဖီထုတ်၊ ငြုပ်သီးစိမ်း၊ ပုဇွန်ခြောက်အကောင်ငယ်လေးများနှင့် အကြော်စုံပါသော လက်ဘက်သုတ် ပန်းကန် နှင့် ရေနွေးကြမ်းအိုးအပြည့်အစုံကို အသစ်ပြင်ဆင်ထားသော အိမ်ရှင်မက လာရောက်ခေါ်ငင်သဖြင့် စာဖတ်ခန်းမှဧည့်ခမ်းဖက်သို့ ပြန်လည်ပြောင်းထိုင်ကြပြန်၏။ (စကားဝိုင်းတွင် အိမ်ရှင်မ, ပါ ပါဝင်လာစဉ်တွင် ပြောကြသော စကားများမှာ ရေးသားလိုသော အကြောင်းနှင့် သက်ဆိုင်ခြင်းမရှိသဖြင့် ဖော်ပြခြင်း မပြုတော့ဘဲ ချန်လှပ်ထားခဲ့ပါသည်)

သိ။  ။ကဲ အချိန်များတောင် တော်တော်လင့်သွားပြီ ပြောရဆိုတာလည်း ကောင်းပါတယ် ကြိုငှားထားတဲ့ တည်းရမဲ့ ဟိုတယ်ကို လမ်းရှာပြီး သွားရအုန်းမှာမို့ ခွင့်ပြုပါအုန်း ကိစ္စလေးတွေ ပြီးတဲ့အခါမှာတော့ မပြန်ခင်တစ်ခေါက်လောက် ကျုပ်တို့ ထပ်တွေ့ကြသေးတာပေါ့ အဲဒီအခါမှာတော့ ကျုပ်က ကျခံပြီး ကျွေးမွေးပါရစေ(ထ၍ လက်ဆွဲအိတ်များကို ဆွဲလျက်)

ကျွန်ုပ်တို့လည်း ကားပေါ်သို့ ပြန်တက်တော့မည့်ကိုဖိုးသိ၏ နောက်တွင် လိုက်ပါ၍ ကားအနားသို့ နီးကပ်မိသောအခါ အိမ်အပေါ်ထပ်၌ ဆော့နေကြသော ကလေးများက ထွက်လာကြပြီး ကိုဖိုးသိကို အော်ဟစ် 'တာ့တာ' ပြကြ၏။

ကိုဖိုးသိသည် ကားပေါ်သို့ တက်လျက် စက်နိုး၏။ သွားရောက်ရမည့် ဟိုတယ်လိပ်စာကို ကားအတွင်းရှိ 'ဂျီပီအက်စ်' လမ်းညွှန်စက်အတွင်းထဲသို့ ထည့်သွင်းပြီးစီးသွားချိန်တွင် ကိုဖိုးသိသည် သူ့ဘေးမှ မှန်ကို ဖွင့်ချလျက် ကျွန်ုပ်ကို အောက်ပါအတိုင်း ထပ်ပြောပြန်၏။

သိ။ ။"ကိုယ့်လူကို ထပ်ပြောချင်တာက နံပါတ်တစ် အနေနဲ့ ဘာရေးရေး ပုဂ္ဂိုလ်စွဲလွတ်အောင်သတိထားရေးပါ နံပါတ်နှစ်က ဘယ်ကနေ ကူးချတယ်မှီးတယ် ဆိုတဲ့ စာညွှန်းသေသေချာချာ ပါပါစေ နံပါတ်သုံးအနေနဲ့ ကိုယ်ရေးချင်တာကို မီးမောင်းထိုးပြဖို့ သူများကို မထိခိုက်နဲ့ မရိပါနဲ့ နောက်တခါ ကိုယ့်လူကနေ ကယ်လဖိုးနီးယားကို 'ရီးတီးရားတား' 'ရိ' ပြီး ထပ်ရေးတာမျိုးကို ကျုပ်ဖတ်မိရင် ကိုယ့်လူကို တခါထဲ ဖေ့စ်ဘွတ်မှာ 'ဘလော့' လိုက်မယ်ဆိုတာကို ကိုယ့်လူကို သတိပေးချင်တယ်"

ကိုဖိုးသိလည်း ကားအပြင်တွင် သွားဖြဲ၍ ၎င်းအား နှုတ်ဆက်နေသော ကျွန်ုပ်ကို ကျာင်းအုပ်ဆရာကြီးတစ်ဦးက အပြစ်ကျူးလွန်ထားသော ကျောင်းသားတစ်ဦးကို အရှေ့တွင် လက်ပိုက်၍ ရပ်စေကာ ဆုံးမ သတိပေး ပြောကြားလိုက်သကဲ့သို့ တလုံးချင်း ပီသလေးနက်စွာပြောလိုက်ပြီးသည့်အခါ ဖွင့်ထားသော ဘေးမှန်တံခါးကို 'ရှီး'ကနဲ လျှင်မြန်စွာ ခလုတ်နှိပ်၍ ပိတ်လိုက်၏။ နှင်းများကို ဖယ်ရှားထားပြီဖြစ်သော်လည်း လက်ကျန်နှင်းများအနည်းငယ်ကျန်ရှိနေသေးသော လမ်းပေါ်တွင် ကားဘီးများ ချော်လဲသွားမည်ကို စိုးရိမ်သည့်အလား ကြိုးတန်းပေါ်တွင် စက်ဘီးစီးပြသူသည် ကြိုးတန်းပေါ်မှ ပြုတ်၍မကျအောင် ဖြည်းညှင်းစွာဖြင့် ထိန်းသိမ်း၍ စီးသွားသကဲ့သို 'ဇွိကျိဇွိကျိ' ဖြင့် ဖြည်းနှေးစွာ ဘီးလိမ့်မောင်းနှင်သွားလေတော့သတည်း။

(မီချီဂန်နှင့် မဟာရေကန်များအကြောင်း ရေးခဲ့စဉ်က မှားယွင်းချက် မပြည့်စုံချက်များကို ပြန်လည်ပြင်ဆင်ရေးသားရာတွင် ကျွန်ုပ်ငယ်စဉ်ကတည်းက နှစ်သက်စွာ အမြဲတမ်းဖတ်ရှု့ခဲ့ရသည့် စာရေးဆရာကြီး "ရွှေဥဒေါင်း" ၏ ရေးဟန်ကို သွေးကူးလျက် 'လူနှစ်ဦး အပြန်အလှန်စကားပြောသည့် တင်ပြနည်း' ဖြင့် ကြိုးစားရေးသားလိုက်ပါသည်။

ဆရာကြီးရွှေဥဒေါင်း၏ စာစကားလုံးများမှာ အောင်မြင်ဖွံ့ဖြိုးသော ပြောင်းဖူးလေးများ၏ ပြောင်းဖူးစိလေးများကဲ့သို့ စီစီရီရီဖြင့် သပ်ယပ်လှပချိမြန်သော်ငြားလည်း ကျွန်ုပ်၏ စာစကားများမှာ မအောင်မြင်သော လယ်မှ ထွက်သည့် အသီးများကဲ့သို့ ပိန်လီ၍ အပြစ်အနာအဆာအကျိုးအပဲ့များပါဝင်နေပါသည်ဟု ဝန်ခံပါသည်။ အားလုံးကို ကျေးဇူးတင်လျက်)

စန်းအောင်

ဒီဇင်ဘာ-၉-၂၀၁၈