"မီချီဂန်သစ်ပင်စကားဝိုင်း"

အပိုင်း(၁)

"မင်းတို့က-

တနှစ်တခါ တယ်ကြွေသကိုးကွယ်"

( ခရစ်စမတ်အပင်က ငြီးတွားလိုက်တာလေး)

အပိုင်း(၂)

နဲနဲ ပြန်ပြောရမှ နေတတ်တဲ့-

အပင်ပျို ရွက်ပျောက်ငနဲလေးက

ထင်းရှုးပင်တွေကို-

"ဟားဟား ခင်ဗျားတို့က အချမ်းဒါဏ်ကြောက်လို့ အရွက်တွေူံထားပြီး လျှောက်ပြောမနေပါနဲ့ဗျာ..

ကျွန်တော်တို့အားလုံးက အအေးဒါဏ် နဲ့ နှင်းတွေကို

ဘာမှ မကာကွယ် မခြုံလွှမ်းဘဲ သတ္တိရှိရှိ ရင်ဆိုင်ရဲ

ကြတာပါ...

 ခရစ်တော်ဖွားတော့ လူတွေက ခင်ဗျားတို့ကို ယူပြီး မီးတွေထွန်းတာကို ဂုဏ်ယူတာတော့ ရပါတယ်..

ကျွန်တော်တို့ကိုတော့ တနှစ်တခါ အရွက်တယ်ကြွေသကိုး  လို့တော့ မပြောသင့်ပါဘူးဗျာ..

ကျွန်တော်တို့က-

အငယ်ဆုံးသောသူတွေထဲ မှာ ပါပါတယ်.."

လို့ ပြန်ပြောလိုက်သတဲ့။

အပိုင်း(၃)

တယောက်နဲ့တယောက် ပြောနေကြတာကို ကြားတဲ့အခါ-

"ဆုံးမသြဝါဒလမ်းညွှန်ချက်၊ မက်ဆေ့ချ်လေးတခုခုပေးရတာပေါ့..."

ဆိုပြီး လုပ်လေ့ရှိတဲ့-

(ကျွန်တော်တို့အရွယ်တန်း "လူမကြီးတကြီး"တွေလို) 

ဆံပင်ထိပ်ပြောင်၊ ဖြူဖြူကျိုးကြဲ (အဲလေ..) 

သစ်ရွက်တွေပြောင်၊ အကိုင်းချောင်၊ ရွက်ဝိုင်းကြဲတဲ အပင်ကြီးတပင်က-

သူ့အပေါ်လာနားလိုက်တဲ့ တောကျီးကန်းကြီးတကောင်ကြောင့် အကိုင်းလေးလှုပ်ခါသွားတာကို-

လေပြေလေအေးလေးအောက်မှာ အလိုက်သင့်

လူးလွန်းလှုပ်ခါယိမ်းထိုးထိန်းချုပ်ရင်း..

ပါးစောင်ထဲက ကွမ်းကို ပျစ်ကနဲထွေး...

(အဲလေ ...လူနဲ့မှားမှား ရေးမိတယ်ဗျာ ခွင့်လွှတ်..!)

သူ့ရဲ့ သိပ်မကျန်တော့တဲ့

အရွက်လေးတရွက်နှစ်ရွက်ကို

တဖျပ်ဖျပ်ခြွေချပြီးတော့-

"အိမ်း..အိမ်း..

ခုနက ညီလေးပင်ပျိုရွက်ပျောက်ပြောသွားတာလေး ကောင်းပါတယ်ကွယ်..

(မသိသေးတဲ့သူတွေကို သိအောင်ပြောရတယ်)လို့

အန်ကယ့်အပင်အောက်မှာ

ရုပ်ရှင်လာရိုက်သွားတဲ့ "နိုင်ငံရေးသမားအကြောင်း" 

ဇာတ်ဝင်ခန်းထဲက မင်းသားကြီးတယောက်ပြောသွားခဲ့ဖူးတာ မှတ်မိနေခဲ့တာပေါ့..

မသိသေးတဲ့သူတွေကို ပထမ သိအောင်ပြောပြဖို့လို

တယ်..

ပြောတဲ့အခါ မကျေနပ်လို့ပြောတာမျိုးတော့ မဖြစ်စေနဲ့..

သူများကိုမထိခိုက်စေနဲ့ကွဲ့...

ဘာတဲ့.. (အငယ်ဆုံးသောသူ) ဆိုလား ကြားလိုက်မိတယ်..

ဒါတော့ အန်ကယ်လက်မခံဘူး..

ဒို့တွေတနှစ်တခါ အရွက်တွေကြွေပြီး-

ဆောင်းအအေးဒါဏ်ကို အကာအကွယ်မဲ့ရင်ဆိုင်ရတာနဲ့ အငယ်ဆုံးသောသူ ဖြစ်ရမှာလား..

စိတ်ဓာတ်ကျ အားငယ်တဲ့အတွေးအပြောအရေး မလုပ်ပါနဲ့ကွယ်..

ဘာအပင်ပဲဖြစ်ဖြစ် အလှကိုယ်စီရှိကြတာပေါ့..

(ထိုစဉ်-

လေအေးလေးက လာပွတ်လိုက်သဖြင့်

ပြုတ်ကျလုနီးပါးဖြစ်နေသော အရွက်တချို့ကို ချွေချလိုက်ပြန်၏)

ဘာတဲ့..အန်ကယ် ကြားဖူးထားတာက-

ဘုရားသခင်ကတဲ့..

အားလုံးကို ဦးခေါင်းအပိုင်းပဲ 

ဖြစ်စေလိုသတဲ့..

အမြီးပိုင်းမဖြစ်စေလိုဘူးတဲ့..

ဦးခေါင်းပိုင်းဆိုတော့ အားလုံးက "ဆရာ့ဆရာကြီး"

"ဦးဆောင်နိုင်တဲ့သူတွေ"ပေါ့..

အမြီးပိုင်းဆိုတာ နောက်လိုက် ဒါမှမဟုတ် အဖွဲ့သား

တွေပေါ့..

အားငယ်စိတ်ဓာတ်ကျတဲ့သူက အမြီးပိုင်းမှာတောင်

အဆင်မပြေနိုင်ဘူး..  

ဒီတော့-

အဲဒီအတွေးတွေအထဲက ရုန်းထွက်လိုက်စမ်းပါ 

ညီလေးပင်ပျိုရွက်ပျောက်ရေ...

(ပြောရင်း လေအဝေ့တွင်

အချို့အရွက်များကို ထပ်၍ ချွေချလိုက်ပြန်၏)

နောက်တခုက-

မသိတဲ့သူတွေက ကိုယ့်ကိုတိုက်ခိုက်ပြောဆိုလာရင်လည်းခွင့်လွှတ်ရမယ်...တဲ့

ဒါတွေက-

အန်ကယ့်အပင်အောက်၊ နွေရာသီအချိန်တွေမှာ

ရောက်လာလေ့ရှိတဲ့ ဘုရားကျောင်းအဖွဲ့က ဆရာတွေ ဟောပြောခဲ့တဲ့ (သခင်ရေရှု ရဲ့အဆုံးအမလေး)တွေ

ပေါ့..

ရေရှု့သခင်က သူ့ကို

ရက်ရက်စက်စက်ရိုက်ပုတ်သတ်ဖြတ်ခဲ့တဲ့သူတွေ

အပေါ် (မသိလို့ လုပ်တဲ့သူတွေအဖြစ်)

ဝေဒနာတွေကြားထဲကနေ ခွင့်လွှတ်ခဲ့သတဲ့..

အခုလည်း "မင်းတို့ငါတို့ကို တနှစ်တခါတယ်ကြွေသကိုး" ဆိုပြီးပြောမိတဲ့ ခရစ်စမတ်အပင်ကြီးကို-

(ဪ.. သူမသိလို့ ပြောမိတာပဲ)ဆိုပြီး 

ခွင့်လွှတ်လိုက်ပါကွယ်..

သူ တကယ်မသိရှာတာက-

ခရစ်စမတ်အပင်တွေ တနှစ်တခါ အသတ်ခံရရှာရတဲ့

အကြောင်းပါပဲ..

သူတို့ခရစ်စမတ်ပင်ပျိုပင်ငယ်လေးတွေကို-

လူတွေက အဆောက်အဦးတွေထဲ အလှမီးထွန်းဖို့

တနှစ်တခါ ခုတ်ကြ ဖြတ်ကြ ရောင်းစားကြသကွဲ့..

အန်ကယ်တို့က တနှစ်တခါကြွေတာကို-

လူတွေက လှလို့ဆိုပြီး ဓာတ်ပုံတွေရိုက် ပြက္ကဒိန်တွေထုတ်နဲ့...

အန်ကယ်တို့ အခုတ်အဖြတ်မခံရပါဘူူး..

အေးဆေးပါပဲ..

သူတို့လေးတွေအဖြစ်ကတော့ စိတ်မကောင်းစရာပေါ့ကွယ်"

ဟု (သူပြောခဲ့သလို "သူများကိုမထိခိုက်စေနဲ့ "ဆိုတာမျိုး သူကိုယ်တိုင်မလုပ်မိဘဲ)ထိခိုက်ပြောဆိုလိုက်လေသတည်း။

စန်းအောင်

နိုဝင်ဘာ-၁၉-၂၀၁ရ

--------------------

မီချီဂန်သစ်ပင်တွေ ဆောင်းဦးမှာ

စကားပြောကြတာကို (အားလုံးစုပြီး ဖတ်လို့ရအောင် ပြန်စုထပ်ထည့်လိုက်ပါတယ်) စိတ်ကူးယဉ်

ရေးထားတာပါ..

အမေရိကား၊ ခရစ်ယန်ဘာသာအများဆုံးရပ်ကွက်

မှာရှိတဲ့ သစ်ပင်တွေက "သမ္မာကျမ်းစာ"မှာပါတဲ့စကားတွေနဲ့ပြောကြတာပေါ့..

ကျွန်တော်တို့ ဗမာပြည်သစ်ပင်တွေ စကားပြောရင်တော့-

 လော်စပီကာနဲ့ကြားဖူးနေကြ ဗုဒ္ဓတရားစကားတွေပြောကြမှာပဲလို့ တွေးမိပါတယ်.

(ဓာတ်ပုံက ကျွန်တော်တို့ အနားက သစ်ပင်တွေကို ရိုက်ခဲ့တာ)